மொழிமுதல் எழுத்துக்கள்

மொழிமுதல் எழுத்துக்கள் அல்லது மொழிக்கு முதலில் வரும் எழுத்துக்கள் என்பவை தமிழில் எழுதும்போது எந்தெந்த எழுத்துக்கள் முதலில் இடம்பெறலாம் என்ற இலக்கண விதியாகும். தொல்காப்பியம், நன்னூல், தற்கால வழக்கு என்பவற்றினூடாக மொழிமுதல் எழுத்துக்கள் எவையென அறியலாம்.

தொல்காப்பியம்

தொல்காப்பியம் மொழிக்கு முதலில் வரும் எழுத்துக்கள் 94 எழுத்துக்களைக் குறிப்பிடுகின்றது. அவை பின்வருமாறு:

எழுத்து வரிசை	எழுத்து	எண்ணிக்கை
உயிரெழுத்து	அ, ஆ, இ, ஈ, உ, ஊ, எ, ஏ, ஐ, ஒ, ஓ, ஔ	12
க	க, கா, கி, கீ, கு, கூ, கெ, கே, கை, கொ, கோ, கௌ	12
ச	சா, சி, சீ, சு, சூ, செ, சே, சொ, சோ	9
ஞ	ஞா, ஞெ, ஞொ	3
த	த, தா, தி, தீ, து, தூ, தெ, தே, தை, தொ, தோ, தௌ	12
ந	ந, நா, நி, நீ, நு, நூ, நெ, நே, நை, நெ, நோ, நௌ	12
ப	ப, பா, பி, பீ, பு, பூ, பெ, பே, பை, பொ, போ, பௌ	12
ம	ம, மா, மி, மீ, மு, மூ, மெ, மே, மை, மொ, மோ, மௌ	12
ய	யா	1
வ	வ, வா, வி, வீ, வெ, வே, வை, வௌ	8
குற்றியலுகரம்	நு	1
மொத்தம்		94

தொல்காப்பியம் குறிப்பிடும் மொழிமுதல் எழுத்துக்களும் அவற்றுக்கான எடுத்துக்காட்டுகளும் பின்வருமாறு:

12 உயிரெழுத்துக்கள்

1. அம்மா
2. ஆடு
3. இலை
4. ஈட்டி
5. உரல்
6. ஊர்வலம்
7. எட்டு
8. ஏணி
9. ஐவனம்
10. ஒளி
11. ஓவியம்
12. ஔவையார்

க வரிசை 12 எழுத்துக்கள்

1. கடல்
2. காடு
3. கிளி
4. கீரி
5. குடி
6. கூடு
7. கெண்டை
8. கேழல்
9. கைதை
10. கொண்டல்
11. கோடை 
12. கௌவை 

த வரிசை 12 எழுத்துக்கள்

1. தந்தை
2. தாத்தா
3. திரை
4. தீபம்
5. துணி
6. தூண்
7. தென்னை
8. தேவர்
9. தையல்
10. தொண்டை
11. தோட்டம்
12. தௌவை 

ந வரிசை 12 எழுத்துக்கள்

1. நதி
2. நாடு
3. நிழல்
4. நீர்
5. நுழை
6. நூல்
7. நெய்தல்
8. நேயம்
9. நைகை
10. நொய்யன
11. நோக்கம்
12. நௌவி

ப வரிசை 12 எழுத்துக்கள்

1. பட்டம்
2. பாடல்
3. பிடி
4. பீடம்
5. புகழ்
6. பூமி
7. பெடை
8. பேடி
9. பைதல் 
10. பொட்டு
11. போதகம்
12. பௌவம்

ம வரிசை 12 எழுத்துக்கள்

1. மண்
2. மாடம்
3. மிடறு
4. மீதி
5. முயல்
6. மூதூர்
7. மென்மை
8. மேனி
9. மையல்
10. மொழி
11. மோகம்
12. மௌவல் 

ச வரிசை 9 எழுத்துக்கள் 

1. சாட்டை
2. சிறுவன்
3. சீற்றம்
4. சுடலை
5. சூரியன்
6. செய்கை
7. சேவல்
8. சொல்
9. சோறு

வ வரிசை 8 எழுத்துக்கள் 

1. வண்டு
2. வாத்து
3. விம்பம்
4. வீடு
5. வெள்ளி
6. வேர்
7. வையம்
8. வௌவு 

ஞ வரிசை 3 எழுத்துக்கள் 

1. ஞா – ஞாலம்
2. ஞெ – ஞெகிழி
3. ஞொ - ஞொள்கிற்று 

ய வரிசை 1 எழுத்து

1. யா - யான்

குற்றியலுகரம் 1 எழுத்து

1. நு - நுந்தை 

நன்னூல்

தொல்காப்பியம் இலக்கண விதியின்படி விலக்கிய எழுத்துகளைச் சேர்த்து மொழிக்கு முதலில் வரும் எழுத்துக்கள் என சில எழுத்துக்களையும் நன்னூல் உள்வாங்கிக் கொண்டது. இதனால் தொல்காப்பியம் குறிப்பிட்ட 94 எழுத்துக்கள் என்ற அளவு நன்னூல் வழிகாட்டலின்படி அதிகரித்தது. நன்னூல் மேலும் 10 எழுத்துக்களையும் சேர்த்ததால் 104 எழுத்துக்கள் மொழிக்கு முதலில் வரும் எழுத்துக்களாயின. நன்னூல்  குறிப்பிடும் மேலதிக 10 எழுத்துக்கள் பின்வருமாறு:

எழுத்து வரிசை	எழுத்து	எண்ணிக்கை
ச வரிசை	ச, சை, சௌ	3
ய வரிசை	ய, யு, யூ, யோ, யௌ	5
ஞ வரிசை	ஞ	1
ங வரிசை	ங	1
மொத்தம்		10

நன்னூல் குறிப்பிடும் மேலதிக மொழிமுதல் எழுத்துக்களும் அவற்றுக்கான எடுத்துக்காட்டுகளும் பின்வருமாறு:

ச வரிசை 3 எழுத்துக்கள்:

1. சனி
2. சைவம்
3. சௌரி

ய வரிசை 3 எழுத்துக்கள்:

1. யவனர்
2. யுத்தம்
3. யூதம்
4. யோகம்
5. யௌவனம்

ஞ வரிசை 1 எழுத்து:

1. ஞமலி

ங வரிசை 1 எழுத்து:

1. அங்ஙனம் - (அ + ஙனம்) 

தற்கால வழக்கு

தற்கால வழக்கில் பிறமொழிகளின் தாக்கம், அதனால் பிறமொழிச் சொற்களை தமிழில் உள்வாங்குதல் போன்ற காரணங்களால் மொழிமுதல் எழுத்துக்கள் என்பதில் தமிழ் இலக்கணம் மீறல் இடம்பெறுகின்றது. அத்துடன், முதல் எழுத்துக்கள் பற்றிய அறியாமையாலும், இலக்கணம் அறியாததாலும் ஊடகங்கள் உட்பல சிலர் பிழையாக மொழிமுதல் எழுத்தைக் கையாளுகின்றனர். மேலும் 247 தமிழ் நெடுங்கணக்கிற்கு அப்பால் தமிழ் எழுத்துக்களில் புகுந்துள்ள வடமொழி எழுத்துக்களாலும் (ஜ, ஸ, ஹ, ஷ, ஶ்ரீ) இந்நிலை ஏற்படுகின்றது.

அத்துடன் ஒலிக்குறிப்புச் சொற்களும் முதன் மொழி எழுத்தாக இடம்பெறுவதுண்டு. 

எடுத்துக்காட்டுகள்:

• கொக்… கொக்… என கோழி கொக்கரித்தது.
• பீரங்கி டமார் என வெடித்தது.

ஆயினும், இலக்கண மீறல் உள்ள சொற்களின் முன்னே  மொழிமுதல் எழுத்துகள் சேர்ப்பது இலக்கணம் வழக்கம் ஆகும். சில எடுத்துக்காட்டுகள் பின்வருமாறு:

• ராமன் – இராமன்
• யேசு – இயேசு
• ரோம் – உரோம்
• ரோசா – உரோசா
• லட்டு – இலட்டு
• லாபம் – இலாபம்
• ரத்தம் – இரத்தம்
• லண்டன் – இலண்டன்

மொழிமுதல் எழுத்துகள் சேர்க்கவியலா இடங்களில் தவிர்த்தும் எழுதப்படுகின்றன.  எடுத்துக்காட்டு: ஃபேஸ்புக் – பேஸ்புக்

சில இடங்களில் மாற்று எழுத்து சேர்ப்பதும் வழமையாகும். எடுத்துக்காட்டு: ஸ்ரீ லங்கா – சிறிலங்கா

மேலும், மொழிமுதல் எழுத்துகள் சேர்க்கவியலாவிடத்து, மாற்றுச்சொற்களை தமிழில் அமைப்பதும் உண்டு. எடுத்துக்காட்டு: ஃபேஸ்புக் – முகநூல், ஸ்பெயின் – இசுப்பானியா